Papa pret Sejdiun. Vatikani: Edhe ne si SHBA e BE

[King_Arthur]

Presidenti i Kosovës, vizitë në Selinë e Shenjtë si kryetar shteti

Presidenti i Kosovës, Fatmir Sejdiu, u prit dje nga Papa Benedikti XVI, u njoftua në një komunikatë të Vatikanit, ku nënvizohej domosdoshmëria e ndjekjes me kujdes të veçantë të zhvillimeve në Kosovë. Sipas Vatikanit, "audienca e akorduar autoritetit më të lartë institucional të Kosovës, që administrohet nga OKB-ja, nuk tregon ndryshim në qëndrimin e Selisë së Shenjtë për statusin përfundimtar të saj", por "synon marrjen e informacioneve në mënyrë të drejtpërdrejtë". Lidhur me shpalljen e mundshme të pavarësisë së Kosovës, Selia e Shenjtë do të ndjekë situatën me vëmendje të veçantë dhe do të përcaktojë qëndrimin e vet të orientuar nga bashkësia ndërkombëtare", shton komunikata. Duke pritur Sejdiun, Benedikti XVI ka dashur "të shprehë afërsinë e tij me të gjithë popujt në botë, ku kristianizmi është i pranishëm që në shekujt e parë pas Krishtit", nënvizon Vatikani. Komunikata nënvizon se në Kosovë jetojnë afro 65 000 besimtarë katolikë. "Selia e Shenjtë nuk lë asnjë rast pa shfrytëzuar për të kontribuar për pajtimin, drejtësinë dhe paqen në rajon", përfundon komunikata e Vatikanit. Bëhet e ditur se Ati i Shenjtë priti Presidentin kosovar mbi të gjitha për t‘i shprehur solidaritetin e tij popullit të Kosovës, por edhe për të marrë informacione të drejtpërdrejta mbi gjendjen aktuale dhe perspektivat për të ardhmen. I ftuari kosovar i Vatikanit, i cili në komunikatën e Selisë së Shenjtë thirret herë "President" dhe herë "autoriteti më i lartë institucional i provincës autonome serbe", u prit vetëm një ditë përpara turneut të dytë të zgjedhjeve presidenciale në Serbi. Sipas analistëve, takimi i të shtunës mund të përfaqësojë një lloj përkrahjeje të Vatikanit në rast se Kosova do të shpallë pavarësinë. Në komunikatë, Selia e Shenjë bëri të ditur se në këtë rast "do të ndjekë me vëmendje zhvillimet dhe, për të vendosur, do të mbajë parasysh edhe tendencën e bashkësisë ndërkombëtare". Sa i përket shpalljes së mundshme të pavarësisë nga ana e Kosovës, Selia e Shenjtë do t‘i ndjekë me vëmendje të veçantë zhvillimet në teren, dhe në vlerësimet e saj do ta ketë parasysh qëndrimin e bashkësisë ndërkombëtare", thuhet në komunikatë.