Hashim Thaçi, kryeministri i ri i Kosovës bën publik kabinetin e tij

[AnGeLiC]

Kryeministri Hashim Thaçi mori detyrën e shefit të qeverisë së Kosovës nga kryeministri i deritashëm, Agim Çeku

Me një ceremoni solemne, me nderimet ushtarake të Togut ceremonial të TMK-së, i cili ishte rreshtuar për të nderuar kryeministrin në ardhje, u bë sot pranim- dorëzimi i detyrës së Kryeministrit të Kosovës, nga Agim Çeku te kryeministri i ri z.Hashim Thaçi.
“Unë e marrë sot këtë përgjegjësi të re me vullnetin më të madh, me vizionin e qartë për një të ardhme më të mirë për vendin dhe gjithë qytetarët” – theksoi kryeministri Thaçi.
Nga ana e tij, kryeministri i deritanishëm Agim Çeku shtoi se ka vlerësim pozitiv për përbërjen e kabinetit të ri qeveritar tw drejtuar nga kryeministri Thaçi, duke e cilësuar premtues.

Një pritje solemne ishte organizuar nga kryeministri në largim Agim Çeku për pasuesin e tij Hashim Thaçi. Para hyrjes në ndërtesën e Qeverisë, Agim Çeku, bashkë me zëvendësin e tij të deritashëm Lutfi Haziri, kanë pritur Hashim Thaçin bashkë me dy zëvendësit e tij, Hajredin Kuçi dhe Ramë Manaj, ku të gjithë bashkë i kanë bërë nderime Togut ceremonial të TMK-së, i cili ishte rreshtuar për të nderuar kryeministrin në ardhje.

Kryeministri Thaçi ka shprehur respekt për punën e Çekut në shërbim të vendit.

“Unë e marrë sot këtë përgjegjësi të re me vullnetin më të madh, me vizionin e qartë për një të ardhme më të mirë për vendin dhe gjithë qytetarët. Në Kosovës do të ketë kontinuitet të përkushtimeve qeverisëse në çdo projekt të mirë që ka pasur kryeministri Çeku”, ka thënë kryeministri Thaçi.

Kryeministri Thaçi gjithashtu tha se do të kultivohet fryma e unitetit dhe angazhimet e përbashkëta që Kosova të bëhet shtet i pavarur. Ai ripërsëriti deklarimin e mëhershëm të tij se Prishtina, Uashingtoni dhe Brukseli e dinë datën e pavarësisë, por përsëri nuk e tha se cila është data.

Nga ana e tij, ish-kryeministri Çeku, mes tjerash theksoi se “tashmë në Kosovës është ndërtuar një demokraci funksionale tha Agim Çeku në konferencën e përbashkët me gazetarët, pasi që kishte bërë zyrtarisht dorëzimin e detyrës. Ai ka uruar kryeministrin e ri që të përmbushë zotimet e bëra duke u shprehur i bindur se po dorëzon mandatin pasi ka bërë gjithë ato punë të mira që ka qenë e mundshme të kryhen nga Qeveria që ka drejtuar.

“Kosova është bërë gati për pavarësi dhe në situatë të tillë po e dorëzojmë Kosovën kryeministrit të ri, Qeverisë së re që besoj se këta do të jenë gjithashtu të suksesshëm. Jemi të vetëdijshëm të gjithë besoj edhe kryeministri është i vetëdijshëm se na presin sfida të mëdha”, ka thënë Çeku.

Çeku shtoi se ka vlerësim pozitiv për përbërjen e kabinetit të ri qeveritar duke e cilësuar premtues.

[AnGeLiC]

Kryeministri i Kosovës, Hashim Thaçi, gjatë ditës së djeshme dhe të sotme ka pranuar telegrame dhe mesazhe të shumta urimi, me rastin e zgjedhjes së tij në postin e kryeministrit të Kosovës. Në një bisedë telefonike, nënsekretari amerikan i Shtetit, Nicholas Burns, ka përgëzuar z.Thaçi duke i konfirmuar mbështetjen e Shteteve të Bashkuara të Amerikës. Edhe Përfaqësuesi i Lartë për Politikë të Jashtme dhe Siguri i Bashkimit Evropian, Havier Solana dhe Komisionari për Zgjerim i Bashkimit Evropian, Oli Rehn, kanë përgëzuar kryeministrin Thaçi për zgjedhjen e tij në postin e Kryeministrit.

Po sot, kryeministri Thaçi ka marrë një mesazh urimi nga kryeministri i Turqisë, Recep Tayyip Erdoğan përmes shefit të Zyrës të Turqisë në Prishtinë, Mustafa Sarnıç, në të cilin thuhet:

“Turqia i kushton rëndësi zhvillimit të marrëdhënieve bilaterale, marrëdhënie këto të cilat bazohen në një të kaluar historike dhe të cilat janë vëllazërore. Besoj nga zemra se marrëdhëniet që po zhvillohen ndërmjet Turqisë dhe Kosovës, në çdo fushë, nën lidershipin tuaj, do të vazhdojnë të zhvillohen edhe më tutje. Turqia do të vazhdojë t’u qëndrojë pranë kosovarëve, ashtu siç ka qëndruar edhe në ditët më të vështira. Me këtë rast do të përsëris dëshirat e përzemërta për shëndetin dhe lumturinë tuaj personale, shëndetin dhe mirëqenien e popullit të Kosovës”.

Po kështu dje kryeministri Thaçi ka marrë mesazhe urimi nga kryeministri i Shqipërisë, Sali Berisha dhe kryetari i Partisë Socialiste të Shqipërisë, Edi Rama, duke i shprehur mbështetjen e plotë dhe të pa rezervë të Shqipërisë.

Gjithashtu kryeministri Thaçi ka marrë një mesazh urimi edhe nga oborri mbretëror i Shqipërisë.

[AnGeLiC]

Unë dua ta nxjerr qeverinë nga mjegulla dhe ta bëj atë të përgjegjshme para qytetarëve të cilëve ajo do të duhej t’u shërbente. Unë zotohem se do t’ i jap fund ciklit të vazhdueshëm të humbjeve, mashtrimeve dhe abuzimeve me paratë e qytetarëve tanë. Do t’i mbetem besnik besimit të dhënë nga qytetarët. Do të kërkoj nga secili ministër që ta bëjë të njëjtin zotim. Lufta kundër korrupsionit do të jetë e ashpër dhe me zero tolerancë ndaj kujtdo dhe kurdoherë.
- tha me rastin e zgjedhjes në postin e kryeministrit të vendit, lideri me numrin më të madh të votave në Kosovë, kryetari i PDK-së z.Hashim Thaçi.

I nderuari kryetar i Kosovës, I nderuari kryetar i Kuvendit të Kosovës,
Deputetë të Kuvendit të Kosovës, Të nderuar qytetarë të Kosovës,

Sot ndjehem i nderuar, që para jush dhe qytetarëve të Kosovës kam rastin të paraqes fjalimin ekspoze të Qeverisë së Kosovës. Më lejoni që në fillim t’i falënderoj të gjithë qytetarët e Kosovës për mbështetjen e dhënë, si dhe kryetarin e Kosovës për dhënien e mandatit për formimin e qeverisë, detyrë kjo që me kënaqësi e kam pranuar dhe me nder e përgjegjësi do ta ushtroj. Ky vit që sapo filluam sjell para nesh, si vend dhe popull, jo vetëm ballafqime dhe sfida të shumta, por edhe shpresën dhe besimin e ringjallur me plot mundësi për të ecur përpara. Është e vërtetë, sot ndodhemi në udhëkryqin më të rëndësishëm të historisë sonë te re. Ne jemi duke u përgatitur që në fillim të pjesës se parë të këtij viti ta bëjmë Kosovën të pavarur dhe sovrane. Vend të mundësive të barabarta për të gjithë qytetarët e saj. Të drejtat e minoritareve do të respektohen dhe garantohen përmes angazhimeve afirmative, të garantuara edhe me Kushtetutë. Për Kosovën e pavarur dhe demokratike populli ynë është i bashkuar si asnjëherë më parë. Ne jemi në një krah dhe të koordinuar ngushtë me miqtë tanë: Shtetet e Bashkuara të Amerikës , Bashkimin Evropian dhe NATO-n. Ëndrrën dhe të drejtën tonë do ta bëjmë realitet. Kosova do bëhet pjesë e familjes së popujve të lirë të botës. Politika e Qeverisë së Kosovës çdo herë do të mbetet e rrënjosur në të drejtën e popullit tonë. Kosova do të jetë e pavarur! Mirëpo, nuk duhet të harrojmë se pavarësia e shumëpritur nuk do t’i zgjidhë të gjitha problemet e vendit tonë. Bashkë me pavarësinë do të vijnë edhe shumë sfida tjera, me të cilat duhet të ballafaqohemi. Është obligim ynë ndaj qytetarëve që të krijojmë lidership të ri dhe të fuqishëm, i cili do të punojë me nder dhe përkushtim të lartë për të bërë shtetin tonë të ri të respektuar.

Të nderuar deputetë,

Agjenda të cilën po e shpalos sot para jush, qëllim parësor ka ndryshimet reale e të menjëhershme, gjithëpërfshirëse dhe rrënjësore. Pikërisht ato ndryshime në të cilat besuan, i kanë kërkuar dhe që i presin qytetarët tanë. Qytetarët tanë me të drejtë janë duke pritur dhe janë duke vëzhguar me kujdes. Ata kanë kërkuar dhe janë përcaktuar për ndryshime. Ata janë duke pritur veprime konkrete dhe të menjëhershme. Prandaj duke filluar këtu, që nga sot, ne duhet t’i përmbushim pritjet e tyre, që janë edhe zotimet tona.

Zonja dhe zotërinj,

Në javët vijuese, unë ne emër të qeverisë së Kosovës do ta prezentoj para qytetarëve tërë projektin gjithëpërfshirës për Reforma Ekonomike. Ky plan do të fillojë ta ngjallë ekonominë kosovare, me qëllim që ta shpjerë vendin tonë në epokën e re të zhvillimit të qëndrueshëm dhe të mundësive. Kjo epokë ndërtohet duke krijuar një klimë në të cilën investitorët, jo vetëm që mund të vijnë dhe të investojnë në Kosovë, por ata mund të operojnë pa probleme, t’i zgjerojnë bizneset e tyre dhe të krijojnë vende të reja pune. Në këtë përpjekje do të udhëhiqemi me një disiplinë, transparencë dhe kujdes të madh financiar. Ne do të sigurohemi që projektet tona kapitale të parapara për këtë vit dhe vitet vijuese të financohen ashtu siç duhet dhe që buxheti të jetë në përputhje me këto projekte. Prandaj, Qeveria e re Kosovës do ta bëjë një rishikim të tërësishëm të Buxhetit të Konsoliduar të Kosovës për vitin 2008. Ne do të jemi të bashkuar në qëllimin tonë për të shënuar rritje ekonmike, duke u pajtuar për uljen e tatimit për biznese, që është më e larta në rajon. Në gjendjen e tanishme, motivi i investitorëve për të ardhur dhe investuar në Kosovë është shumë i ulët. Ulja e kësaj takse do të dërgojë mesazh të qartë për tërë botën se Kosova është e hapur për biznes. Veprimi tjetër që duhet të bëjmë së bashku është sigurimi i kredive me kamata të ulëta dhe afatgjata. Ato kredi do të jenë të përshtatshme për bizneset, dhe do ta vërtetojnë faktin se në Kosovë mund të krijohen vende të reja pune. Të shkojmë në hap më tutje – zotohemi për krijimin e Zonave Industriale të cilat do ta stimulojnë rritjen ekonomike. Përmes lehtësirave të ndryshme tatimore, të dizajnuara për t’i tërhequr bizneset e reja në Kosovë, bizneseve ekzistuese do t’u krijojmë mundësi të zgjerimit dhe të krjimit të më shumë vendeve të punës. Që ta dëshmojmë se Kosova është e hapur për biznes, ne duhet të ballafaqohemi me sfidat më të mëdha ekonomike: Energjinë dhe Infrastrukturën.

Deputetë të nderuar,

Përkushtimi ynë për energjinë dhe infrastrukturën do të jetë konkret dhe serioz. Mungesa e energjisë së vazhdueshme do të konsiderohet nga qeveria e Kosovës si një krizë nacionale Prandaj, qeveria do të përgatitë një pako reformash të gjithanshme për t’i tejkaluar problemet ekzituese, për të garantuar furnizim të rregullt dhe normal me energji. Unë kërkoj ndihmën tuaj për të gjetur zgjidhje të shpejta për problemet ekzistuese. Në këtë aspekt duhet të jemi inovativ: do t’i studiojmë të gjitha mundësitë alternative të energjisë, duke u nisur nga energjia diellore e deri tek ajo e erës, që të sigurohemi për përmbushjen e nevojave tona. Do të vazhdojmë përpjekjet për ta bërë Kosovën vendin më të gjelbër në Evropën Lindore. E gjithë bota është duke u përballur me dilemën se “ ku do ta gjëjmë energjinë e domosdoshme për furnizimin e ekonomisë globale të shekullit të 21-të, pa shkaktuar dëme të pariparueshme për ambientin tonë natyror?" Përse të mos bëjmë përpjekje që ta bëjmë Kosovën një vend që mund të japë përgjigje në këtë çështje? Ju ftoj që Kosovën ta bëjmë një qendër rajonale të pastër për kërkime në lëmin e energjisë, për zhvillim, prodhim dhe hapje të vendeve të reja të punës. Të sigurohemi që t’i tërheqim kompanitë nga e gjithë bota, të cilat merren me prodhimin e energjisë së pastër dhe rigjeneruese për të ardhmen.

Të nderuar deputetë,

Krijimi i rrjetit infrastrukturor ndërkufitar efikas do të jetë gjithashtu prioritet i Qeverisë së Kosovës. Duke filluar nga rrugët e deri tek hekurudhat, ne duhet të punojmë së bashku që t’i modernizojmë ato dhe të ndërtojmë infrastrukturë të re për ta lidhur vendin tonë në çdo kënd. Do ta integrojmë infrastrukturën tonë në rrjetin e transportit ndërkombëtar dhe të ecim drejt implementimit të standardeve evropiane. Projekti ynë nuk synon vetëm uljen e shpenzimeve për bizneset, por edhe rritjen e konkurrencës, stimulimin e investimeve dhe krijimin e vendeve të punës.

Zonja dhe zotërinj,

Në ditët e sotme, mundësitë varen nga fuqia e dijes, prandaj kompanitë janë në gjendje të udhëtojnë në çdo vend të botës për ta gjetur këtë fuqi. Investojnë aty dhe lidhen me të. Do të fillojmë t’i implementojmë prioritetet tona në fushën e arsimit, me qëllim që të ballafaqohemi me sukses me kërkesat e shekullit 21. Ju ftoj që ta fillojmë realizimin e qëllimit tonë qysh sot - ta bëjmë Kosovën lider rajonal në përgatitjen e studentëve për karrierë në lëmin e matematikës, shkencës dhe tekonlogjisë informative. Pojekti ynë shpalos pakon e detajuar për reformat në arsim, e cila do të sigurojë mundësi të reja për studentët tanë dhe do t’i sigurojë prindërit se fëmijët e tyre, fëmijët tanë do të kenë mundësi ta vënë në funksion potencialin e tyre intelektual. Do ta fillojmë këtë projekt të madh duke krijuar Fondin Nacional për Arsim, duke i ngritur pagat e mësimdhënësve, duke i motivuar ata me shpërblime për arritjet në punë. T’i ndihmojmë lokalitetet tona duke ndërtuar shkolla të reja dhe kështu të lehtësojmë gjendjen e rëndë ekzistuese. Përveç kësaj, do të fillojmë menjëherë me vendosjen e qendrave kompjuterike në shkollat tona, me qëllim që jo vetëm t’i lidhim shkollat ndërmjet veti, por edhe me shtetet tjera moderne të botës. Do të krijojmë një sistem të vlerësimit të dijes për nxënësit dhe do të punojmë intensivisht në licencimin e arsimtarëve. Do të krijojmë një sistem universitar të shekullit të 21-të, i cili siguron kuadro të specializuara në matematikë, shkencë dhe tekonlogji informative. jë sistem i cili iu mëson studentëve tanë shkathësitë e domosdoshme për të arritur suksese në ekonominë e avancuar të së nesërmës. Së bashku ta bëjmë arsimin një asset të dobishëm për gjeneratat e ardhshme. T’ i fuqizojmë fëmijët tanë që ata të korrin suksese në karrierën e tyre, inovatorë dhe kreatorë të së nesërmes.

Të nderuar deputetë,

Në kohët që vijnë Kosova do të formësojë institucionet e veta demokratike dhe do të fuksionojë si nje shtet i plotë në tërë territorin e saj.

Qytetarë të Kosovës,

Unë kërkoj unitetin tuaj të vazhdueshëm, besimin dhe mirëkuptimin. Sfidat me të cilat ballafaqohemi nuk janë të pakta dhe zgjidhjet nuk do të mund të jenë aq të lehta dhe të shpejta. Programi që do të prezantoj, do të fillojë të zbatohet në praktikë që nga sot, por nuk do të mund të përfundojë gjatë vitit të parë të kësaj qeverie. Do të kemi udhëtim të gjatë bashkërisht. Pa, bashkohuni me mua që të fillojmë këtë udhëtim që nga sot, ta fillojmë të bashkuar në shpirtin e shpresës, vendosmërisë dhe të mundësive.

[AnGeLiC]

Dua t’ju falënderoj sinqerisht që më dhatë mundësinë që të artikuloj këtu para jush zërin e të gjithë qytetarëve të Kosovës. Kjo asamble e nderuar ka qenë vendi ku janë marrë vendime të mëdha, që kanë ndikuar në stabilitetin dhe zhvillimin botëror, përfshirë edhe vendimet lidhur me ndarjen tragjike dhe të dhunshme të Jugosllavisë.

Kanë kaluar tetë vite qëkur Këshilli i Sigurimit vendosi Kosovën nën administrimin tranzicional të Kombeve të Bashkuara. Në emrin tim, dhe në emër qytetarëve të Kosovës, të gjithë qytetarëve, nga të gjitha grupet etnike, dua t’ju falënderoj për ndihmën e vazhdueshme që u keni dhënë institucioneve të Kosovës dhe procesit të ndërtimit të demokracisë në shoqërinë tonë. Ne dolëm nga një luftë e gjatë dhe e tmerrshme, dhe falë jush, ne kemi bërë hapa të mëdhenj drejt ndërtimit të një shoqërie më stabile, më demokratike dhe multietnike.

Në veçanti, dua të falënderoj z. Joakim Ryker dhe të gjithë zyrtarët e UNMIK-ut të cilët kanë punuar me ne tani e më shumë se tetë vjet. Ne, së bashku jemi ballafaquar me shumë vështirësi dhe pengesa, por kemi arritur edhe suksese të përbashkëta.

Raporti i Sekretarit të Përgjithshëm të OKB-së për Kosovën dokumenton progresin real që kemi arritur dhe punët që mbesin për t’u bërë. Zhvillimet demokratike në Kosovë bënë edhe një hap përpara vitin që lamë pas. Ne patëm zgjedhje të lira dhe multietnike dhe një transferim paqësor të autoritetit. Në fakt, që nga viti 1999, ne kemi mbajtur pesë palë zgjedhje të lira dhe demokratike, zgjedhje këto model për rajonin. Kemi ndërtuar institucione demokratike, profesionale dhe shumë etnike. Në këtë rrugëtim ne kemi pasur mbështetjen e vazhdueshme të UNMIK-ut dhe institucioneve tjera të respektuara ndërkombëtare, si: BE-së, OSBE-së, NATO-s, etj, dhe në emër të qytetarëve të Kosovës dua t’ju shprehë mirënjohjen time të thellë.

Natyrisht, që në zhvillimin dhe operacionalizimin e institucioneve tona, ne jemi ballafaquar me shumë sfida. Siç raportoi edhe Sekretari I Përgjithshëm, mbetet ende shumë punë për t’u bërë në mbrojtjen e të drejtave, kulturës dhe sigurimin e minoriteteve etnike. Fatkeqësisht, lufta e fundit në Kosovë la prapa një trashëgimi mosbesimi dhe jotolerance etnike. Si pjesëtar i shumicës në Kosovë, unë jam i vetëdijshëm për përgjegjësinë e veçantë që kemi ne si shqiptarë të Kosovës në tejkalimin e kësaj trashëgimie dhe në krijimin e një ambienti ku secili qytetar i Kosovës do të ndihej i mirëseardhur.

Në ditët e mia të para si kryeministër, unë kam ndërmarrë hapa drejt afrimit me komunitetet joshqiptare. Me mburrje them para jush se unë tashmë kam emëruar dy bashkëqytetarë të mi serbë dhe një turk si ministra në qeverinë time. Unë kam vendosur që, në kuadër të zyrës sime, të hapë një zyrë të veçantë për komunitetet, me përgjegjësi të veçantë për çështjen e pronave. Unë jam i përkushtuar që të gjejë mënyra të reja komunikimi me qytetarët serbë dhe komunitetet tjera. Minoritarët në Kosovë nuk janë barrë, apo rast i veçantë në shoqërinë tonë; ata janë pjesë e zemrës së shoqërisë sonë, dhe prezenca e tyre mes nesh e rritë dhe pasuron shoqërinë, kulturën dhe vendin tonë.

Integrimi i të gjitha komuniteteve etnike në shoqërinë tonë dhe në jetën tonë politike ka qenë i vështirë dhe është ballafaquar me shumë sfida të veçanta. Për shembull, është për të ardhur keq vendimi i Beogradit për inkurajimin e serbëve të Kosovës që të mos marrin pjesë në zgjedhjet e fundit në Kosovë. Ne besojmë që të gjithë qytetarët mund të avokojnë interesat e tyre në kuadër të institucioneve, që i kemi ndërtuar me udhëzimet e Kombeve të Bashkuara.

Sidoqoftë, ne jemi të vetëdijshëm që integrimi i plotë i komuniteteve joshqiptare në shoqërinë tonë kërkon më shumë se vetëm fjalë të mira për pajtimin. Edhe qeveria ime, edhe qeveria e paraardhësit tim, kanë treguar përkushtimin dhe zotimin e tyre në përmirësimin real dhe konkret të jetës së përditshme të minoriteteve tona.

Më lejoni t’ju jap ca shembuj. Tani ne kemi rritur intensitetin e punës në respektimin e të drejtave pronësore të të gjithë qytetarëve tanë, përfshirë këtu shtyrjen e padive në rastet e pronave të uzurpuara. Ne ofrojmë qasje të shërbimeve tona qeveritare në shumë gjuhë. Ne po synojmë që të mbajmë përfshirjen e lartë të minoriteteve në Shërbimin Policor të Kosovës. Ne po mbrojmë trashëgiminë kulturore dhe fetare të komuniteteve joshqiptare, përmes krijimit të zonave të mbrojtura përreth objekteve fetare, dhe përmes riparimit të dëmeve që u janë bërë kishave. Ne po vazhdojmë përndjekjen e pakompromis ndaj atyre që kanë kryer krime etnike. Ne po financojmë projekte që facilitojnë kthimin e personave të zhvendosur dhe po mundohemi që ta themi sa më qartë dhe sa më zëshëm që minoritetet kanë jetë dhe të ardhme në Kosovë. Dhe në fund, ne po përgatisim një plan për decentralizimin e pushtetit lokal, përfshirë këtu krijimin e komunave të reja dhe fuqizimin e mëtutjeshëm të komuniteteve.

Ju lutem mos e nënvlerësoni madhësinë e këtyre sfidave, posaçërisht kaq shpejt pas një lufte të tmerrshme, e cila ndau dhe i vuri etnitetet tona kundër njëra tjetrës. Sidoqoftë, unë zotohem sot para jush, se Qeveria e Kosovës do të përfaqësojë të gjithë qytetarët e saj. Unë zotohem para jush se do të punoj me përkushtimin dhe vendosmërinë më të madhe për përfshirjen e komuniteteve joshqiptare në shoqërinë dhe institucionet tona. Unë zotohem se do ta bëjmë Kosovën një vend të dëshirueshëm për të jetuar, duke ndërmarrë veprime afirmative për pakicat tona, posaçërisht për komunitetin serb.

Kosova është shtëpi e të gjithë qytetarëve të saj, qofshin ata shqiptarë, serbë, boshnjakë, turq apo romë. Unë zotohem se do të punoj pareshtur që komunitetet pakicë të kenë të drejta të barabarta me ligj, mundësi të barabarta në shoqërinë tonë, dhe vëmendjen e posaçme të qeverisë sime. Unë do të punoj që të kemi raporte të mira fqinjësore me Serbinë, vend ky me të cilin duhet të mësohemi të zhvillojmë mënyra më të mira të komunikimit dhe bashkëpunimit në fushat e interesave të përbashkëta.
Shkelqësi të nderuara,

Ne tani e dimë që paqja e vërtetë nuk është vetëm mungesa e konfliktit, por ngadhënjimi I lirisë dhe vlerave demokratike. Kombet e Bashkuara mund të krenohen me Kosovën.

Ne tani kërkojmë të shkojmë një hap më tutje në zhvillimin tonë politik dhe shoqëror, duke marrë më shumë pronësi mbi të ardhmen tonë. Ne riafirmojmë dëshirën tonë që të ecim përpara bazuar në planin e të dërguarit të posaqëm të OKB-së për Kosovën Presidentit Marti Ahtisari. Plani I tij na ofron mundësi që ta bëjmë Kosovën vend më demokratik, një shoqëri multietnike të integruar plotësisht në strukturat evropiane. Rekomandimi I tij për pavarësi të mbikëqyrur për Kosovën njeh faktin që shpërbërja tragjike, e dhunshme dhe jo konsensuale e Jugosllavisë në njërën anë , dhe në anën tjetër spastrimi etnik dhe periudha e administrimit ndërkombëtar e kanë pamundësuar që Kosova dhe Serbia të jetojnë në një shtet. Dokumenti i Ahtisarit ofron edhe një plan të detajuar për garantimin e sigurisë dhe të drejtave të minoriteteve në Kosovë, plan të cilin ne jemi të zotuar që ta implementojmë plotësisht.

Me respektin për z. Tadiq, dy vjetët e fundit të përshkuara nga dështimet e njëpasnjëshme të negociatave konfirmojnë që Serbia dhe Kosova nuk do të mund të pajtohen kurrë për një bashkim mes tyre.

Në emër të popullit të Kosovës, dua të shpreh mirënjohjen time për Bashkimin Evropian në përkushtimin e tyre për të luajtur rol ndihmues, posaçërisht në zhvillimin dhe ndërtimin e policisë dhe në fushën e sistemit të drejtësisë, në fazat fillestare të sovranitetit të Kosovës. Së bashku me misionin e ri ndërkombëtar në Prishtinë, ne do të ndërtojmë një shoqëri ku të drejtat e komuniteteve pakicë janë jo vetëm të garantuara me akte ligjore, por janë zotim në të gjitha veprimet e qeverisë dhe shoqërisë. Ne po ashtu mirëpresim zotimin e NATO-s për ta vazhduar misionin e tyre në ofrimin e një ambienti të qetë dhe të sigurt.

I nderuari President,
Shkelqësi te nderuara,

Ne besojmë që ka ardhur koha të zgjidhim problemin e fundit të madh të mbetur nga shpërbërja e Jugosllavisë. Unë e kuptoj që jo të gjithë anëtarët e Këshillit të Sigurimit mbështesin implementimin e rekomandimeve të të dërguarit të posaçëm të OKB-së për statusin , z. Ahtisari, në veçanti jam i vetëdijshëm për rezistencën ndaj rekomandimin për pavarsinë e Kosovës. Sidoqoftë, unë besoj që pavarësisht nga zhvillimet në fushën e definimit të statusit politik, të gjithë anëtarët e Këshillit do të mbështesin punën tonë në konsolidimin e demokracisë, në promovimin e multietnicitetit dhe në ndërtimin e një rajoni më të përparuar dhe më të sigurt për të gjithë.

Unë jam këtu jo vetëm për të folur, por edhe për të dëgjuar.
Faleminderit sinqerisht për vëmendjen tuaj!

[AnGeLiC]

Analistët politikë vlerësojnë se më i rëndësishmi në këtë takim të KS-së ka qenë fjalimi i kryeministrit Thaçi, i cili ka simbolizuar luftën e UÇK-së dhe ka reflektuar vullnetin politik të mbrojtur me armë

Mbledhja e radhës e Këshillit të Sigurimit të Organizatës së Kombeve të Bashkuara, ndonëse nuk ka sjellë ndonjë rezultat konkret, ka nxjerrë në pah qëndrimin e qartë të palës së Kosovës për shpallje të pavarësisë së shpejtë të saj. Kryeministri i Kosovës, Hashim Thaçi, i cili mbajti fjalim në KS, prapa dyerve të mbyllura, pas takimit u ka thënë gazetarëve se shpallja e pavarësisë është çështje ditësh, por kjo do të bëhet në pajtim me Brukselin dhe Uashingtonin. Paralajmërimi i kryeministrit Thaçi për shpallje të pavarësisë është komentuar në mënyra të ndryshme nga analistët në Kosovës. Sidoqoftë, ajo që është shumë e rëndësishme, sipas tyre, është që në KS është dëgjuar zëri i kryeministrit, i cili njëherit simbolizon edhe luftën e UÇK-së dhe vullnetin politik të mbrojtur me armë.

Shpallja e pavarësisë pas ardhjes së misionit të BE-së

Duke komentuar deklaratën e kryeministrit Thaçi në takimin e KS-së për shpallje të shpejtë të pavarësisë, analisti Ramush Tahiri ka thënë se ka disa dilema se kur duhet të ndodhë një gjë e tillë, mirëpo, ai ka thënë se ajo që është më e rëndësishme është se kjo shpallje duhet të koordinohet me bashkësinë ndërkombëtare, me faktorin që do të njohë dhe ajo duhet të prodhojë siguri për të gjithë qytetarët e Kosovës dhe ruajtje të integritetit territorial të saj. “Ka dilema se a duhet të shpallet para ardhjes së misionit të Bashkimit Evropian apo pas ardhjes së tij. Unë jam i mendimit se duhet pasi të vjen misioni, në atë periudhën e parë tremujore të konsolidimit të misionit, sepse ky mision do të ketë mandat që edhe nuk mund ta kundërshtojë atëherë pavarësinë”, - është shprehur Tahiri. Sidoqoftë, Tahiri e ka vlerësuar fjalën e kryeministrit, duke thënë se me këtë rast në KS është prezantuar vullneti politik i mbrojtur me armë gjatë luftës së zhvilluar nga UÇK-ja. “Është shumë e rëndësishme që është pranuar mirë fjala e tij dhe nga të gjithë bashkëbiseduesit është parë se vazhdimi i negociatave nuk mund të sjellë asgjë të re, se palët ndeshen në qëndrimet e tyre dhe se tash çështja kalon në Bashkimin Evropian”, - ka thënë Tahiri, sipas të cilit, përpjekjet serbe për vazhdimin e negociatave janë të kota përderisa nuk ndërron qëndrimi i Serbisë.

Qëndrime shpresëdhënëse të shteteve perëndimore

Ndërkaq, analisti Ilir Dugolli, mbledhjen e KS-së e ka vlerësuar pa ndonjë risi të veçantë, ngase sipas tij, risi do të ishte nëse çështja do të ishte zgjidhur. “Unë nuk e besoj se është pritur ndonjë risi. Kuptohet do të kishte qenë shumë më mirë që çështja të ishte e zgjidhur dhe të mos kishte nevojë që të mbahen më mbledhje të Këshillit të Sigurimit, pasi që KS është i bllokuar dhe nuk ka mundësi të vendosë për këtë çështje, ka thënë Dugolli. Megjithatë, Dugolli e ka vlerësuar si pozitive vendosmërinë e shteteve perëndimore që është e paluhatshme. “Ka pasur qëndrime tejet shpresëdhënëse se nuk mund të ketë zvarritje të problemit”, - ka thënë ai.
Sa i përket shpalljes së pavarësisë së Kosovës, Dugolli nuk ka dashur të komentojë, mirëpo ai ka thënë se skenari i shpalljes së pavarësisë nuk do të ndodhë para zgjedhjeve në Spanjë. “Një gjë e tillë është shumë e mundshme pasi dihet se një kërkesë të tillë e ka bërë ministri i Jashtëm i Spanjës fjala e të cilit çon peshë shumë tek institucionet e Kosovës”, - ka thënë ai. Nga ana e tij, Behlul Beqaj, nuk ka parë asgjë serioze sa i përket zhvillimeve politike. “Paralajmërimi i palës së Kosovës për shpallje të pavarësisë nuk është asgjë, ne nuk kemi në dorë asgjë, jemi ‘out’ . Unë nuk po shoh tani ndonjë gatishmëri për punë serioze. Lojërat po luhen nga të tjerët e ne jemi vetëm vëzhgues”, - ka thënë Beqaj, duke shtuar se më të harmonizuar janë rusët dhe serbët sesa politikanët në Kosovë.

Periudhë e rëndësishme

Në mbledhjen e KS-së të OKB-së, shefi i UNMIK-ut Joakim Ryker ka raportuar për situatën në Kosovë gjatë tre muajve të fundit. Kryetari i Kosovës, Fatmir Sejdiu, duke e komentuar këtë takim, ka thënë se ka thënë se kjo tregon se Kosova është në periudhën e zhvillimeve shumë të rëndësishme. “Ne vetëm mund të falënderojmë mbështetjen e thellë që i jepet Kosovës nga SHBA-ja dhe BE-ja. Mendoj se është rrugë shumë e studiuar kah Kosova do të ecë në këtë bashkëpunim të koordinuar për të arritur qëllimin e vet, për të ndërtuar atë që ne kemi thënë me zotimin esencial, një Kosovë për të gjithë qytetarët, një Kosovë që do të jetë shtet demokratik dhe modern, dhe pavarësisht se mund të ketë edhe vrojtime të tjera, ne do ta kapërcejmë me sukses edhe këtë kohë”, - ka theksuar Sejdiu.

[AnGeLiC]

Thaçi:Pas vizitës që do t’i bëjë Brukselit gjithçka do të jetë e qartë për statusin e ardhshëm të Kosovës

Kryeministri Hashim Thaçi, ka thënë se pas vizitës që do t’i bëjë Brukselit gjithçka do të jetë e qartë për statusin e ardhshëm të Kosovës. Thaçi ka deklaruar se nuk ka pozitë dhe opozitë kur bëhet fjalë për zgjidhjen e statusit të Kosovës. Ai i ka bërë këto komente pas takimeve të ndara që ka zhvilluar më dy liderët e partive opozitare: të AKR-së Behxhet Pacolli dhe të LDD-së Nexhat Daci. Thaçi ka theksuar se do të punohet me gjithë spektrin politik për të përmbyllur statusin e vendit. Ndërsa kryetari i AKR-së Pacolli ka thënë se populli ka votuar njerëzi që mendoj se do të bëjë ndryshime në vend. Ai ka përgëzuar kryeministrin Thaçi për punën që është duke bërë këto ditë të para të mandatit të tij. Për një bashkëpunim me qeverinë për statusin e Kosovës është shprehur i gatshëm të jetë edhe lideri i LDD-së Nexhat Daci. Ai ka theksuar se partia e tij, do të jetë zë i fuqishëm për ndërtimin e shtetit demokratik dhe funksional të Kosovës. Sipas Dacit LDD-ja nuk do të jetë opozitë e qeverisë në ketë plan. Ndërkaq në Çagllavicë kryeministri Thaçi ka thënë se pavarësia e Kosovës nuk është diçka që duhet shkaktojë frikë për asnjë komunitet që jeton në Kosovë. Ai u ka bërë thirrje serbëve të zhvendosur që të kthehen në Kosovë, duke garantuar se qeveria e tij do të punojë në integrimin e plotë të komuniteteve, në veçanti atij serb.