Gjyqtari Bergonzi, me eskortë, kërcënime pas Napoli-Juventus

08/03/2008
Kishte akorduar dy penallti të dyshimta kundër bardhezinjve

Jeton i fshehur, si një mafioz i penduar. I mbrojtur nga policia, ka qëndruar larg shtëpisë për dy javë rresht. Kjo i ka ndodhur një arbitri futbolli, që "është mes më të mirëve në Itali", ashtu si e ka përkufizuar presidenti i Shoqatës Italiane të Gjyqtarëve (AIA), Çezare Gusoni. Ky i fundit nuk ka bërë publikë emra, por mediat italiane kanë zbuluar se bëhej fjalë për gjyqtarin Mauro Bergonzi, protagonist në takimin e shumëpërfolur Napoli-Juventus (i datës 27 tetor 2007: 3-1 në favor të napoletanëve falë dy penalltive inekzistente), e që ishte pezulluar për një kohë relativisht të gjatë nga dizenjatori i gjyqtarëve, Kolina. Së fundmi, në kampionatin italian, më të kontestuarit kanë qenë dy arbitra ndërkombëtarë, Paolo Dondarini dhe Stefano Farina. I pari ka gabuar totalisht në ndeshjen Rexhina-Juventus (2-1), duke ngritur protestat e klubit bardhezi, ndërsa i dyti është bërë protagonist në takimin Katania-Inter, zikaltrit kanë fituar 0-2 mes kundërshtimeve të vendasve.

"Tani mjaft, përpara se të jetë shumë vonë", ka deklaruar kreu i AIA-s, Gusoni. Më tej, ai ka shpjeguar ngjarjen e pabesueshme: "Ka ndodhur një episod shumë i rrezikshëm: një grup njerëzish ka rrethuar një person, të cilin e kishin ngatërruar me një gjyqtar. Ata tentuan ta merrnin peng dhe ta rrihnin keqazi. Gjithçka vetëm se ai i ngjante një arbitri (futbolli) porsi një sozi. Ishte drejtor i filialit të një banke dhe vetëm për këtë arsye i shpëtoi dhunimit fizik. Pas kësaj që ndodhi, policia këshilloi gjyqtarin (Bergonzin) që të jetonte nën mbrojtjen e agjentëve dhe të transferohej në një tjetër qytezë për dy javë". Gusoni vazhdon më tej: "Nuk mund të jetohet më në këtë mënyrë: nuk është vetëm dizenjatori Kolina që është kërcënuar (dy fishekë dhe prej tre muajsh jeton me eskortë), por edhe drejtuesit e tjerë që kanë lidhje me gjyqtarët kanë marrë letra kërcënuese, fishekë... Për më tepër, disa gjyqtarë të Serisë A janë vënë në qendër të kërcënimeve, sms dhe letra ofenduese. Kemi lajmëruar menjëherë policinë, por a mund të vazhdohet më kështu?" Përgjigjen e jep vetë ai: "Nuk e di nëse mund të vazhdohet: ne themi tani mjaft. Së fundmi janë shtuar episodet e dhunës në fushat ‘e vogla‘, në kategorinë e dytë dhe të tretë. Dhuna është e lidhur me disa deklarata të personave që shpërndajnë helm. Afro 200 gjyqtarë kanë përfunduar në spital, e nuk po flasim për pështyma apo për shpulla. Krahinat më të rrezikshme janë Kampanja, Pulia dhe Kalabria. Gjyqtarët e Pulias kërkonin të mos arbitronin më. Nuk kemi marrë asnjë vendim, në fakt, as që nuk kemi diskutuar rreth kësaj. Megjithatë e përsëris: edhe gjyqtarët kërkojnë që të kenë të drejtë të gabojnë. Ashtu si futbollistët, apo si disa trajnerë". Gusoni është i shqetësuar, sepse gjyqtarët duan të mos gjykojnë, ose të paktën t‘i fillojnë me vonesë ndeshjet. Në Itali ka 26 mijë "xhaketa të zeza": në vit drejtojnë 650 mijë ndeshje, kosto mesatare 60 euro në ndeshje, për një total prej 39 milionë eurosh. "Grupimi" drejtohet nga tre "bilbila": Rozeti, Farina e Ricoli. Janë ata krerët e revoltës. Në të gjithë këtë situatë, edhe vetë Kolina ka menduar të largohet në fund të sezonit.

besoj e moret kete info...
tema nuk ka me diskutim....u kyc