SK Vllaznia

King_Arthur · #1 01-02-08, 06:01 AM

Themeluar: 1919

Pjesëmarrje në kampionate: 67 herë

Ndeshja e parë: 1930

Kampionate të fituar: 9

Kupa të fituara: 5

Superkupa të fituara: 2

Uniforma zyrtare: Kuq e blu

Trajner: Mirel Josa
Zëvendëstrajnerë: Avenir Dani
Sekretar klubi: Agim Medja
President: Valter Fushaj

King_Arthur · #2 03-02-08, 05:32 AM

Rizvanolli-Abazaj, krutanët shuajnë ambiciet shkodrane

Kastrioti mund 3-1 Vllazninë dhe shkëputet nga fundi i tabelës

Surpriza e ndeshjeve të para të vitit 2008 në Kategorinë Superiore ka qenë fitorja 3-1 e Kastriotit ndaj Vllaznisë që pretendon për titullin kampion. Ekipi krutan ka qenë një ndër më aktivët në merkaton e janarit, si në afrimin e lojtarëve të rinj, ashtu edhe në largimin e futbollistëve, një lëvizje që ka rezultuar shumë e suksesshme. Kthimi Oriand Abazajt te Kastrioti ka përforcuar ndjeshëm repartin e avancuar të krutanëve dhe këtë e ka provuar e para Vllaznia. Sulmuesi i larguar nga Tirana në merkaton e janarit ka treguar aftësitë e tij në zonën kundërshtare që në minutën e parë të ndeshjes, duke arritur të mposhtë Grimën me një diagonale të saktë. Shkodranët mundohen të reagojnë dhe Sinani me Kaçin i afrohen dy herë radhazi portës së Kastriotit, por është Mustafa që ruan avantazhin me një ndërhyrje vendimtare. Thuajse e gjithë pjesa e parë flet për shkodranët që mundohen të gjejnë të çara në prapavijën krutane, por pa ia arritur qëllimit. Por me fillimin e pjesës së dytë, kuqeblutë arrijnë të barazojnë rezultatin falë një 11-metërshi të transformuar saktësisht nga Sinani, duke krijuar idenë se përmbysja ishte më se e realizueshme. Por është përsëri Abazaj që në minutën e 61-të, pasi krijon panik në mbrojtjen shkodrane, jep një top të saktë për Rizvanollin që nuk gabon, duke e dërguar atë në rrjetë. Vllaznia duket e dorëzuar pa kushte dhe kjo bën që loja tashmë të zhvendoset tërësisht para portës shkodrane, ku Grima arrin të shpëtojë dy herë katërkëndorin e tij nga gjuajtjet e Abazajt. Por as gardiani shkodran nuk mund të bëjë asgjë në minutën e 84-t, kur Rizvanolli shfrytëzon një pasim të saktë të Bulkut për të dërguar përsëri topin në rrjetë. Rezultati 3-1 shuan çdo shpresë për një rezultat pozitiv të Vllaznisë dhe kuqeblutë thjesht kontrollojnë topin në minutat e mbetura të ndeshjes, duke u larguar kokulur nga stadiumi i Shijakut, ku u zhvillua ky takim. Tashmë skuadra e Josës është shumë larg kreut të renditjes dhe rrezikon edhe objektivin e saj dytësor, pjesëmarrjen në Kupat e Evropës në sezonin e ardhshëm.

King_Arthur · #3 06-02-08, 06:29 AM

“Nuk kam ndierë ndonjëherë shqetësim më të madh, se pas humbjes së pësuar ndaj Kastriotit”, është shprehur dje pasdite tekniku i Vllaznisë, Mirel Josa, sapo kishte dalë nga një analizë me skuadrën e tij në dhomat e stadiumit “Loro Boriçi”. Në fakt, nuk ishte aspak e vështirë ta kuptoje, sa i lodhur dukej ai prej rezultatit zhgënjyes të skuadrës së tij përballë Kastriotit modest. Teksa i kërkojmë të na zbulojë faktorët, që e çuan Vllazninë në këtë paraqitje, Josa përmend shpesh fjalën “karakter”, duke e përdorur në kuptimin që lojtarët ishin të mbingarkuar psikollogjikisht, nga dëshira për ta fituar patjetër atë ndeshje. Sipas teknikut, një goditje e rëndë ishte pësimi i golit shumë shpejt, gjë që shkaktoi daljen e skuadrës nga shinat, ndryshe nga si e kishte menduar paraqitjen e saj në këtë ndeshje. Sidoqoftë, për pjesën e parë ai thotë se skuadra e tij kishte një farë reagimi në fushën e lojës, ndërsa për të dytën, sidomos pas barazimit me golin e Sinanit, Josa shprehet shumë i pakënaqur me lojtarët, sidomos me nervozizmin që shfaqën në kërkim të rezultatit medoemos, ngaqë gjatë gjithë javës psikollogjikisht ishin përgatitur për tjetër gjë. “Në këto kushte, skuadra u çorodit, duke pësuar edhe dy gola të tjerë dhe mund të ndodhte të pësohej edhe i katërti”, pohon Josa.

Mbingarkesa psikollogjike ﷓ Tekniku kuqeblu ka reaguar edhe ndaj disa komenteve mediatike, që humbjen e Vllaznisë, me Kastriotin, e kanë argumetuar me euforinë pas fitores së bujshme me Tiranën. “Nuk është aspak e vërtetë që skuadra ka qenë me efurorinë e fitores me Tiranën, sikurse mundohen ta interpretojnë disa persona. Unë them që skuadra ka qenë shumë e mobilizuar për ta fituar ndeshjen, por dëshira e madhe, karakteri “i sëmurë” për ta fituar medoemos këtë ndeshje, duke mos pranuar asnjë rezultat tjetër përveç trepikëshit, e çoi në atë paraqitje. Skuadra u zhballancua nga ana taktike, por jo pak edhe nga nervozizmi që pushtoi totalisht lojtarët. Pastaj, pati edhe probleme të tjera, që erdhën nga humbja e dyluftimeve në mesfushë, si dhe prishja e ekuilibreve në repartin e mbrojtjes”, ka preferuar të saktësojë Josa.

King_Arthur · #4 21-02-08, 06:16 AM

Han pëlqen Ilir Nallbanin, kosovari duhet të zgjedhë
Vendimi për ta marrë në skuadër Ilir Nallbanin ka rezultuar i suksesshëm. Ata që e kanë rekomanduar afrimin e tij te kuqeblutë kanë goditur me të vertetë në shenjë. Një gjë të tillë e përligj paraqitja e tij, përfshirë edhe 90 minutëshin e fundit të luajtur në stadiumin “Flamurtari” të Vlorës. Sipas specialistëve që e ndoqën nga afër ndeshjen, ka spikatur si ndër më të mirët në fushë. Një formë të tillë, edhe në mesjavën e kaluar në stadiumin “Beslidhja” të Lezhës, ku jo vetëm goli spektakolar i tij, por dhe loja plot rendiment morën vlerësime pozitive. “Nallbani po luan mjaft mirë, duke e justifikuar plotësisht besimin që patëm tek ai në merkaton e janarit”, thotë për të, presidenti i Vllaznisë, Valter Fushaj.

Vetë Nallbani, i pyetur për ndeshjen e së dielës së kaluar në Vlorë, vlerëson luftën e fortë sportive: “Kemi qenë shumë pranë fitores, por edhe ata patën mundësi ta bënin një gjë të tillë në fund të ndeshjes, kështu që them se barazimi ka qënë rezultati më i drejtë”, thotë Nallbani, që gjithsesi, nuk lë pa përmendur edhe gjykimin e ndeshjes. “Për hir të së vërtetës, ato që ka shprehur Lika një ditë më parë në “Sport Ekspres” janë më se të vërteta”, shton Nallbani duke konfirmuar edhe një herë se dy rastet e golave të shënuar nga Flamurtari në portën e Vllaznisë janë shoqëruar me faulla të sulmuesve vlonjatë, ndërkohë një faull flagrant ka qenë edhe ndërhyrja ndaj Licit, në momentin e goditjes së topit në drejtim të portës vlonjate.

Emocionet e Pavarësisë

Iliri ka qenë në fushë të dielën, kur po nënshkruhej Deklarata e Pavarësisë së Kosovës. “Në Vlorë kemi mbërritur që prej së shtunës në darkë, dhe sapo jemi futur në dhomë, së bashku me Ilirin, jemi “gozhduar” pranë ekranit të televizorit për të ndjekur zhvillimet në Prishtinë”, thotë Alban Jusufi, kosovari tjetër i Vllaznisë. Dhe, këto emocione i kanë shoqëruar dy kosovarët e Vllaznisë edhe gjatë paradites të së dielës. U ka bërë përshtypje edhe përgatitja për festë e vlonjatëve, që kanë shpalosur një flamur gjigant në tapetin e stadiumit. “Pse me ju rrejtë, aty e kam psur mendjen gjatë të gjithë kohës. Edhe në pushim, në dhomat e zhveshjes, pyeta shokët që ishin me radio në vesh”, shton Iliri, që nuk lë pa përmendur thirrjet dashamirëse nga tribunat e tifozëve vlonjatë, që në disa raste kur ai ishte në zotërim të topit brohoritnin për Kosovën.

King_Arthur · #5 01-03-08, 07:47 AM

Sfida e nesërme në stadiumin e Kavajës, mes Besës dhe Vllaznisë, po përjetohet me emocione akoma pa filluar. Vetë fakti që shorti i Kupës së Shqipërisë i ka vendosur këto dy skuadra të luajnë përballë njëra tjetrës edhe në turin e tretë, madje që të mërkurën e ardhshme, e ka shtuar edhe më tepër interesin për përballjen mes këtyre skuadrave. Në Shkodër, gjatë ditës së djeshme vetëm për këtë ndeshje flitej, ndoshta edhe sepse rezultatin e saj e lidhin me fatet e ecurisë së mëtejshme dhe me pretendimet në kampionat. Në fakt, një situatë e tillë ishte edhe në transfertën vlonjate, ku skuadrës kuqeblu i duhej vetëm fitorja. Megjithatë, edhe pse nuk u arritë plotësisht objektivi, loja e mirë dhe rezultatet favorizuese të skuadrave të tjera rivale kanë lënë gjithçka hapur për ndeshjet e tjera, ndërsa “barometri” nga Vlora është zhvendosur në Kavajë.

Optimizmi i Sashës

Kongolezi me pasaportë gjermane është ndër ata pjesëtarë të formacionit kuqeblu, që shprehet tepër optimist për një rezultat pozitiv në transfertën kavajase. I tillë është shprehur edhe dje, kur i pyetur nga “Sport Ekspres” ai është përgjigjur krejt i qetë: “Në Kavajë duhet të fitojmë patjetër. Në atë ndeshje na duhen medoemos tri pikët, sepse vetëm kështu do të mund të konsolidohemi në vendin e tretë dhe pastaj të shikojmë se sa mund të ecim më lart”. Sipas tij, edhe pse nga tifozeria kërkohet që skuadra të ngjitet patjetër më lart në tabelë, Vllaznia duhet të mendojë më tepër për këtë vend që ka, sepse çdo hap i gabuar mund ta zbresë më poshtë. Sidoqoftë, në lidhje me objektivin Sasha shprehet se mundësitë e Vllaznisë janë për të kapur vendin e dytë në kampionat, gjë që, sipas tij, mund të bëhet realitet në ndeshjet e fazës së tretë. Duke iu rikthyer përballjes së nesërme në Kavajë, Delain, edhe pse shpreh respekt për Besën, këmbëngul me besim se Vllaznia do të kthehet në Shkodër me tri pikë. “Unë e njoh skuadrën kavajase dhe kam respekt për të, pasi jo shumë larg ishte protagoniste në kampionat, por kam mendimin se nuk është më ajo Besa e mëparshme. Luhatjet dhe problemet që ka kaluar, qoftë me stafin teknik, por edhe me disa prej futbollistëve, e kanë dobësuar atë, ndaj unë kam besim se do ta mundim atë në fushën e saj”, thotë Sasha. Këtë optimizëm kongolezi e bazon te mobilizimi i skuadrës së tij në këtë ndeshje, gjë që është vënë re edhe në seancën stërvitore të djeshme, ku të gjithë futbollistët tregonin një gjendje optimale psiko﷓fizike.

Pasi shansi i doli në “derë”

Ndërsa flasim pak për ecurinë e tij, e cila në fazën e parë nuk ka qenë aspak pozitive, aq sa pozitat e tij ishin tepër të diskutueshme për të qëndruar te Vllaznia, por në periudhën e fundivitit e më pas ka shënuar përmirësime të ndjeshme, ai shprehet i kënaqur me veten. “Eshtë e vërtetë që pata një fillim aspak të mirë, ndoshta jo dhe aq për fajim tim, por sidoqoftë duhet lënë mënjanë tashmë ajo histori”, thotë Sasha, duke rikujtuar edhe problemet e pezullimit, apo edhe të gjobës financiare që pati marrë nga drejtuesit e klubit. Madje, aq keq i patën shkuar punët Sashës, sa në fundin e vitit të kaluar ai po bënte gati valixhet për t’u larguar, ashtu si bënë dy kolegët e tij, Leandro dhe Simo, por fati i doli në derë. I ndodhur ngushtë pas një dëmtimi serioz të Licit, Josa e aktivizon menjëherë Sashën në vendin e tij, në qendër të mbrojtjes. Falë asaj ndeshjeje spektakolare, që zhvilloi skuadra ndaj Tiranës në “Loro Boriçi”, pjesë e së cilës ishte edhe Delain, që mori vlerësime superlative, situata ndryshoi tërësisht në favor të tij.

Dëshira, një kompeticion europian

Forma e mirë sportive e ka shoqëruar në mënyrë konstante Sashën edhe në ndeshjet ku, edhe pse skuadra jo pak herë ka marrë kritika për dobësitë e saj, ai është vlerësuar jo pak për lojën e tij. Një gjë e tillë ishte prezente edhe në ndeshjen e së mërkurës për kupë, me Skenderbeun, ku sërish Delain u dallua në qendër të mbrojtjes. Ndaj ai shprehet i kënaqur për atë që po arrin të japë për Vllazninë, ndërkohë që thotë se një gjë të tillë do të vazhdojë ta bëjë deri në përfundim të sezonit, me dëshirën dhe synimin që skuadra të përfshihet në një nga Kupat e Europës. Madje, një gjë e tillë lidhet edhe me vazhdimin e bashkëjetës me Vllazninë, që, siç thotë ai, ajo mund të vijojë vetëm nëse kuqeblutë do të jenë në Europë.

Tema te ngjashme
Tema	Nismëtari i temës	Forumi	Përgjigje	Postimi i Fundit
Albania Superligue	King_Arthur	Futbolli Shqipëtar	2	03-03-08 05:49 AM

Opsionet e temes
Trego versionin e printueshem Dërgo kete faqe me Email