Lajmi i dites 24/02/2008 FBI, hetim mafies edhe në Shqipëri

Kryeprokurorja Ina Rama në SHBA për bisedime në Byronë Federale të Investigimit. Rishqyrtohen lidhjet e grupeve të trafikantëve

Vizita e Kryeprokurores Ina Rama në SHBA është ndalur edhe në njësinë Task-Forcë kundër krimit shqiptar në FBI. Struktura më e re është ngritur disa muaj më parë, pas konstatimit se shumë shqiptarë bashkëpunojnë me familjet mafioze italiane që veprojnë në qytetet kryesore në Amerikë. Ata, në disa raste, kryesojnë edhe aktivitetin e tyre kriminal, aktivitet i cili është ndër prioritetet e FBI-së për luftën kundër krimit transnacional, ku piketohet beteja me mafien shqiptare. Drejtësia amerikane, konkretisht Byroja Federale e Hetimeve (FBI), deklaron se organizata kriminale famëkeqe "La Cosa Nostra" është një ndërmarrje e organizuar me lidhje të drejtpërdrejta me mafien siciliane dhe mbetet një rrezik i rëndësishëm kriminal ndaj shoqërisë amerikane. Ndërsa theksohet se agjentët e FBI-së kanë filluar të hetojnë sindikatat e organizuara kriminale shqiptare, euro-aziatike, aziatike dhe afrikane. FBI ka caktuar personel në Romë për të bashkëpunuar me autoritete policore dhe hetimore italiane për të luftuar mafien siciliane. Task-Forca për krimin e organizuar shqiptar është financuar pjesërisht edhe nga Departamenti i Mbrojtjes. Prej disa ditësh, Kryeprokurorja shqiptare Ina Rama po zhvillon një vizitë trejavore në SHBA, ku është njohur me raporte të ndryshme të FBI-së, CIA-s, si dhe ato të shërbimeve inteligjente evropiane, të cilat theksojnë rrezikun që po i kanoset shoqërisë amerikane, nga mafia shqiptare dhe ajo ndërkombëtare. Nuk kanë qenë të pakta vizitat dhe bashkëpunimi i Byrosë Federale të Hetimeve me autoritetet shqiptare. Vizitë të ngjashme në SHBA ka kryer edhe ish-prokurori i Përgjithshëm Theodhori Sollaku, si dhe dhjetëra prokurorë nga Krimet e Rënda, të cilët kanë diskutuar për mënyrën e bashkëpunimit me FBI-në për të shkatërruar krimin shqiptar që po lulëzon në qytetet kryesore në Amerikë. Byroja Federale e Hetimeve, e cila ka ngritur një zyrë pranë godinës së Prokurorisë së Përgjithshme, mësohet se po bashkëpunon me drejtësinë shqiptare për verifikimin e pasurive të individëve shqiptarë të përfshirë në familjet mafioze italiane që veprojnë në SHBA. "Janë disa individë, të arrestuar apo gjykuar në Amerikë, të cilët dyshohen se paratë e fituara nga veprimtaritë kriminale në SHBA i kanë investuar në vendin tonë", thanë burimet nga akuza qendrore. Sipas tyre, hetuesit do të hetojnë në zyrat e regjistrimit të pasurive të paluajtshme dhe më pas, duke iu drejtuar gjykatës, do të zhvillohen procedurat e sekuestros paraprake. Një dyshim i akuzës është se individët kriminalë i kanë kaluar pronat në emrin e familjarëve të tyre. Hetuesit shqiptarë, të ndihmuar nga agjentët e FBI-së në Shqipëri, po studiojnë dosjet e shqiptarëve që dyshohen se kanë marrë pjesë në disa ngjarje kriminale të drejtuara nga familjet mafioze italiane. Njëkohësisht hetuesit kanë zbuluar se krahas familjeve italiane, në Nju Jork, disa individë shqiptarë themeluan organizatën kriminale "Korporata", e cila drejtohej nga Aleks Rudaj. Dëshmitë flasin për një "luftë" për më të fortin midis familjes "Gambino" dhe grupeve shqiptare për zonat në Astoria dhe Queens. Kundërshtarët shqiptarë kësaj here kanë qenë në aleancë me familjen kriminale Lukese. Familja Lukese, e themeluar më 1950, kontrollonte klubet në Astoria, përmes shoqatave greke. Por, pas vdekjes së bosit në burg dhe dënimit të një pjesëtari tjetër me burgim të përjetshëm, kontrolli filloi të lëkundej dhe vendin e tyre e zunë individët shqiptarë, me në krye Aleks Rudaj. Duke parë fitimet e mëdha nga aktivitetet e paligjshme, të cilat llogariten në miliona dollarë, hetuesit amerikanë ngrenë dyshimet se një shumë e konsideruar të hollash është investuar në vendin tonë. Pritet që në akuzën qendrore të fillojë një procedim penal për pronat e dyshuara të individëve shqiptarë, të arrestuar apo të dyshuar për afera korruptive në SHBA. Krahas verifikimet të pronave të pjesëtarëve shqiptarë në grupin "Gambino", akuza tha se do të fillojë një hetim të plotë edhe të pronave të të arrestuarve të fundit në familjen "Xhenoveze". Ened Gjelaj dhe Dardan Çela dyshohen se kanë prona në vendin tonë. Gjithsesi do të jenë verifikimet e akuzës qendrore, të cilat do të hetojnë edhe për pronat e dyshuara. Dy shqiptarët janë arrestuar disa muaj më parë në kuadër të shkatërrimit të organizatës kriminale të familjes "Xhenoveze".


"Korporata"

Shqiptarët u dënuan

me burg dhe me gjobë


Një grup kriminal i quajtur "Korporata" ka arritur të zërë vendin e një prej familjeve mafioze italiane, "Gambino". Madje kreu i grupit, Aleks Rudaj, kryente të njëjta veprime si pjesëtarët e familjes italiane, duke nxitur FBI-në të kryejë një hetim të hollësishëm për këtë rrjet. Pas hetimeve u arrit të arrestoheshin katër shqiptarë. Në datën 4 janar të vitit 2006 gjykata amerikane e Nju Jork-ut ka dhënë një dënim ndaj organizatës mafioze "Korporata". Në këtë proces u shpallën fajtorë katër prej drejtuesve të organizatës famëkeqe, të cilët u dënuan me më shumë se 25 vjet burg secili. Kështu Aleks Rudaj dhe Nardino Kaloti u dënuan me 27 vjet burg secili, ndërsa Nikola Dedaj 26 vjet e 7 muaj burg dhe Prenka Ivezaj u dënua me 22 vjet burg. Në konkluzionet përfundimtare të hetimeve të zhvilluara edhe nga FBI, prokurorët deklaruan para gjykatës se shqiptari Aleks Rudaj, në bashkëpunim me një anëtar të familjes italiane "Gambino", kishte formuar organizatën kriminale të njohur në Nju Jork me emrin "Korporata". Katër drejtuesit që u dënuan në Nju Jork janë akuzuar nga autoritetet amerikane për trafik armësh, përfshirje në sulme të armatosura, mbledhje borxhesh, pjesëmarrje në biznese ilegale të bixhozit dhe basteve të paligjshme.

Sapo e lexova ne gazeten shqip kete artikull mu duk interesant dhe intrigues.

__________________
No how, No way, No McCain
Hillary Clinton, Denver

"The most important kind of freedom is to be what you really are. You trade in your reality for a role. You trade in your sense for an act. You give up your ability to feel, and in exchange, put on a mask. There can't be any large-scale revolution until there's a personal revolution, on an individual level. It's got to happen inside first."