Ethet, mbrëmë lamtumira për Himena Ymerin

King_Arthur · #1 04-02-08, 06:03 AM

Faza finale e "Etheve", vijon tashmë me 5 konkurrentë. Sfida e secilit prej tyre bëhet më e vështirë. Ndërsa spektakli fiton më shumë emocione

Tashmë mbeten 5 konkurrentë deri në finalen e madhe, që do të jetë pas tri të dielave. Rrethi ngushtohet, sfida vështirësohet, emocionet shtohen, "Ethet" bëhen më të forta, por dhe më të pamëshirshme. Pa dyshim që 5 të mbeturit janë më të mirët e qindra e qindra të rinjve që kanë konkurruar për talentin e këngës që tre muaj më parë, kur masa e tyre ishte tejet e madhe dhe jo kaq e vogël sa ka mbetur, sa gishtat e dorës, lehtësisht të numërueshme. Ata janë më të mirët, por që vetëm një prej tyre do të jetë më i miri. Dhe këto janë "Ethet", të cilat i kushtohen "njëshit", rruga e të cilit kalon nga qindra e dhjetëra më pas deri në altarin e fituesit. Po të jesh prapa kuintave e kupton më së miri se çfarë është ajo garë që zhvillohet të dielave mbrëma në skenën e Teatrit të Operës dhe Baletit, që transmetohet direkt në "Top Channel". Të gjithë konkurrentët janë të angazhuar me veten; interpretojnë çdo çast këngët më të cilat do të prezantohen para publikut e jurisë, bëjnë vokalica të pandërprera, e eksperimentojnë me regjistrat e zërit, për të qenë sa më të përkryer; kujdesen për pamjen e jashtme dhe fare pak mendojnë për ndonjë shans të trishtë, për ndonjë humbje në fund. Këtë askush nuk e çon ndërmend. Dhe sigurisht që emocionet fillojnë e shtohen duke u afruar fundi, e pasi kanë lënë skenën e pasi kanë dëgjuar mendimin e jurisë, te konkurrentët, nisin dilemat; rritet shkalla e supersticiozitetit, por mungon ndonjë lule me petale, te të cilat fshihet verdikti final: fitoj apo s‘fitoj?!

Nata e mbrëmshme e "Etheve" solli padyshim treguesin e rritjes së cilësisë së interpretimit nga ana e konkurrentëve. Ata u prezantuan me një hit të njohur "love song", nga ato që vijojnë jo vetëm t‘u rezistojnë viteve, por dhe të mbesin në shkallën më të lartë të preferencave nga publiku, si dhe me një këngë nga festivalet në Radio Televizion, të cilat janë shquar për temat sociale në subjekt, por dhe për vështirësitë e klasit në interpretim. Bëhet fjalë për këngë të famshme të festivaleve në vitet ‘94-‘98, të cilat ishin revolucionare në lloj, për vetë mesazhet që përcillnin. Fatkeqësisht të tilla këngë me të tilla subjekte mungojnë sot, por ja që ato rikthehen për "Ethet", duke mbetur kështu në fondin e artë të muzikës së lehtë shqiptare.

Sakaq, praktikë e spektaklit është që të gjithë konkurrentët ta provojnë veten në disa lloj ose sa më shumë lloje të kënduarish, në rryma e rrjedhimisht në stile të ndryshme. Mungon sigurisht vetëm interpretimi i këngës me motive popullore, jo për ta injoruar, por sepse nuk është pjesë e spektaklit që në konceptim. Po ashtu, edhe të interpretuarit lirik apo operistik. Sepse është spektakël i gjithi. Për këtë arsye, aty është interpretuar e do të vazhdojë të interpretohet, rock, pop, xhaz, bluz, balada të ndryshme. Moderatori i njohur, Adi Krasta, pa të cilin "Ethet" nuk do të kuptoheshin dot e aq më pak të ndiqeshin, si çdo natë të diele, edhe mbrëmë, u ka bërë një rezyme të shkurtër këngëve që ishin zgjedhur për interpretim, duke kujtuar interpretuesit e parë të tyre, ata që i kanë sjellë në skenë e te publiku. Kështu, Krasta shërben edhe si një lloj telegrafisti për kujtesën e publikut, si një lloj gazetari i mirëfilltë informues për pjesën enciklopedike të spektaklit. Po kështu, edhe për pjesët e zgjedhura të trupës së baletit të "Top Channel", të cilat janë hite të njohura si kolona muzikore të filmave të famshëm hollivudianë. Në këtë pikë, "Ethet", lëvrojnë dhe pjesën historike, apo atë të nostalgjisë, ku breza të tërë në Shqipëri mbetem mrekullisht peng i tyre, pasi u rritën dhe u edukuan me to në vitet e izolimit shpirtëror. Këto i bëjnë "Ethet" që të jenë të të gjithëve.

Pjesa tjetër spektakolare e "Etheve" është realizimi artistik televiziv nga ana e "Top Channel", si në sallë, ashtu dhe në transmetimin televiziv. Në sallë, ajo që shijohet "live", është madhështia e skenës, cilësia e lartë audio e padyshim, emocionet e përjetimit direkt të garës dhe interpretimit. Ndërsa në televizion, vihet re klasi i lartë teknologjik, sidomos në pastërtinë e figurës dhe pasurinë e planeve që ofrohen nga shumë kamera, ku disa prej tyre janë krane. Meritë të madhe ka stafi i realizimit në "Top Channel", më i specializuari që ekziston sot në Shqipëri, me mjeshtërinë e pakrahasueshme në realizimin e spektakleve të mëdha.

"Ethet", kanë mbërritur në gjysmën e rrugës. 5 konkurrentë janë eliminuar. Disa e kanë kaluar lehtë, me të qeshur e me shumë falënderime e disa me lot, por sërish me falënderime. Në të dielat pasardhëse, pritet eliminimi i katër konkurrentëve të tjerë, për të mbërritur te fituesi. Spektakli vazhdon, emocionet rriten, "Ethet", sjellin ethe...

Konkurrentët

Vijojnë garën:

Kejsi Tola - Tiranë

Marjela Billa - Tiranë

Fatlum Zeka - Prishtinë

Dorina Xërxa - Gjakovë

Dorina Garuci - Shkodër

-----------------------------

Janë eliminuar:

Evin Thana - Prizren

Simona Karafili - Kavajë

Xhensila Myrtezai - Tiranë

Rezarta Smaja - Shkodër

Himena Ymeri - Tiranë